2016-cı il iyunun 1-də metronun bir neçə stansiyalarında rəsmlərdən ibarət posterlər yerləşdirilib. Bununla, 1 İyun – Uşaqların Beynəlxalq Müdafiəsi Gününə həsr olunmuş daha bir sosial layihə gerçəkləşib.
Uşaqların Beynəlxalq Müdafiəsi Günü münasibətilə təşkil olunan “Uşaqlar bizim gələcəyimizdir!” devizli layihə çərçivəsində rəsmlər metronun “Sahil”, “Memar Əcəmi”, “Elmlər Akademiyası”, “Gənclik”, “Nəriman Nərimanov” və “Qara Qarayev” stansiyalarında xüsusi lövhələrdə yerləşdirilib.
Layihənin maraqlı cəhəti ondan ibarətdir ki, istedadlı balalar, məhz metropoliten əməkdaşlarının övladları, nəvələridir. Azərin Qədirli (“Gəzinti”), Dəniz Paşayeva (“Mənim dünyam ailəmdir”, “Gəlin, dünyamızı qoruyaq”), Hikmət İsmayılov (“Lalələr”), Fidan Rüstəmli (“Bizim sevimli metromuz”, “Uşaqların rəngli dünyası”), Ləman Mustafayeva (“Hər daşı bir aləm şəhər”) və Sevinc Bağırovanın (“Görüş”) çəkdikləri rəsmlərdə bir-birindən fərqli mövzular əks olunub.
Bir il əvvəl Uşaqların Beynəlxalq Müdafiəsi Günü münasibəti ilə “Nəriman Nərimanov” stansiyasının yeni təmir olunmuş iki keçidi uşaqların rəsm qalereyasına çevrilmişdi. Həmin sərgidə əsas məqsəd, cəmiyyətdə uşaqlar arasında rast gəlinən talassemiya və bu kimi qan xəstəliklərinə qarşı mübarizəyə diqqəti artırmaq, könüllü və mütəmadi donorluğu təbliğ etmək, eyni zamanda könüllü qan donorlarına olan ehtiyacı və zərurəti nümayiş etdirmək idi.