Bu günlərdə şəhərimizin sakinləri maraqlı fləşmobun şahidi olub. Fleşmobun keçirilmə yeri isə heç kəsin gözləmədiyi yerdə, Bakı Metropolitenində baş tutub.
Bir qrup gənc Azərbaycan Gənclər Fondunun dəstəyi ilə Bakı Metropolitenində maraqlı və kreativ aksiya həyata keçirmişdir. Layihənin məqsədi Üzeyir Hacıbəyovun 130 illik yubileyini əbədiləşdirmək, onun əsərlərini cəmiyyətə tanıtmaq və kreativ şəkildə dahi şəxsiyyəti yad etmək olub. Metronun qatarlarından birində qəflətən 20 nəfərə qədər musiqiçi Üzeyir Hacıbəyovun bəstələdiyi Arazbarı əsərini maraqlı tərzdə ifa edib. Keçirilmiş fleşmobun nəzərə çarpan əsas xüsusiyyəti isə klassik kompozisiyada istifadə olunan alətlərin əvəzinə milli alətlərdən istifadə olunmasıdır. Beləki, layihədə saz, tar, kamança, ud və digər milli alətlərdə gənclərin ifasını görmək olardı.
Xatırladaq ki, müasir Azərbaycan peşəkar musiqi sənətinin və milli operasının banisi Üzeyir Hacıbəyov 18 sentyabr 1885-ci ildə Ağcabədidə dünyaya gəlmişdir. Şərqdə ilk operanın və hazırda Azərbaycan Respublikasının dövlət himninin müəllifidir.