18 İyun 2020 11:31

Hamıya tanış səs sərnişinlərə müraciət edir

Daha 6 tipdə yeni posterlər təqdim olunacaq

Yeni tipli koronavirus (COVID-19) pandemiyası ilə əlaqədar sərnişinlər arasında virusun yayılmasına diqqəti daha da yaxından cəlb etmək məqsədilə sosial təbliğat kampaniyasını davamlı olaraq gücləndirən "Bakı Metropoliteni" QSC daha bir neçə silsilə yeniliyini sərnişinlərin diqqətinə təqdim edir.
Məlumdur ki, Azərbaycan Respublikası Nazirlər Kabineti yanında Operativ Qərargahı cari il may ayının 9-da Bakı metropoliteninin sərnişindaşıma fəaliyyətini 38 günlük fasilədən sonra bir sıra şərtlər daxilində, o cümlədən ictimai nəqliyyat üçün elan edilmiş metodiki göstərişin müvafiq tələblərinə uyğun bərpa edilməsi barədə məlumat yaymışdı.
Həmin tələblərə əsasən, sərnişinlər metropolitendə sosial məsafəni qorumalı və tibbi maska taxaraq hərəkət etməlidirlər. Bu məsələlərə sərnişinlərin diqqətini cəlb etmək üçün təbliğatını fərqli formatlarda qurmuş metropolitendə səsli elanların verilməsinə də xüsusi diqqət ayrılırdı. Buna qədər stansiyalarda əsasən, növbətçilər və nəzarətçilər, qatarlarda isə maşinistlər, mütəmadi olaraq, sərnişinlərə metodiki göstərişlərin tələblərinə əməl edilməsi ilə bağlı çağırışlar edirdilər.
Artıq qatarlarda müvafiq tövsiyələr məşhur aparıcı, televiziya və radio sahəsində səmərəli fəaliyyətinə görə, Azərbaycan Respublikasının Prezidenti cənab İlham Əliyevin Sərəncamı ilə “Tərəqqi” medalına layiq görülmüş DJ Fateh təxəllüslü Məmmədəli Məmmədovun səsi ilə təqdim edilir. Onu da əlavə edək ki, qatarlarda səsləndirmək üçün aparıcının 8 fərqli müraciətinin səs yazısı lentə alınıb. Bu müxtəliflikdə əsas məqsəd sərnişinləri mövzu yeknəsəqliyilə yormadan monotonluğu aradan qaldıraraq onların diqqətini metodiki göstərişlərin tələblərinə cəlb etməkdir.
Məşhur aparıcının səsi ilə belə müraciətlər tezliklə stansiyalarda da yer alacaq. Qatarlardan fərqli olaraq stansiyalardakı müraciətlərdə "COVID-19"la əlaqədar təkcə Bakı metropolitenində deyil, ümumiyyətlə, Azərbaycan Respublikası Nazirlər Kabinetinin, o cümlədən Səhiyyə Nazirliyinin, TƏBİB-in və Ümumdünya Səhiyyə Təşkilatının tövsiyələri də yer alacaq.
Qeyd edək ki, bu qəbildən olan sosial aksiyalarını davam etdirən Bakı metropoliteni iyun ayının 1-dən 4-dək Uşaqların Beynəlxalq Müdafiəsi Günü münasibətilə məktəbəqədər yaşlı uşaqların dili ilə sərnişinlərə səslənmişdi.
Bundan savayı, davamlı olaraq statik məlumatları da yeniləyən Bakı metropoliteni 6 yeni variantda plakat və posterləri təqdim edir. Bu posterlərdə "Bakı Metropoliteni" QSC-nin koronavirus infeksiyası ilə bağlı şüar çağırışları, eləcə də bu xüsusda həyata keçirdiyi tədbirlərin mahiyyəti də yer alır. Bunlar arasında ventilyatorların iş rejimi, əsaslı və cari dezinfeksiya işlərinə də sərnişinlərin diqqətinə təqdim olunur.
"Bakı Metropoliteni" QSC özünün həyata keçirdiyi layihələrlə yanaşı, TƏBİB və "Bakı Media Mərkəzi" ilə əməkdaşlıq şəraitində stansiyalarda "COVID-19"la əlaqədar bir çox sosialyönümlü təbliğat kampaniyaları həyata keçirilir. Stansiya monitorlarında videoçarxlardan, eləcə də statik məlumatlandırma və təbliğat imkanlarından da geniş istifadə edilir. Bu günlər metropoliten stansiyalarının sütunlarında da sosial çağırışları əks etdirən tərtibatların yerləşdirilməsinə başlanılıb.





Bütün xəbərlər