20 YANVAR / 2023 / 10:39
“Mən 1990-cı il yanvarın 19-dan 20-ə keçən gecə metroda təlimatçı maşinist idim. Bizə əvvəlcədən xəbər verilmişdi ki, gecə sovet qoşunları şəhərə girəcək. Saat 23:00-da evə getmək istəyən əməkdaşlara dedim ki, evdən yemək gətirib geri qayıdın. Metronu işlətmək üçün isə maşinistləri evlərindən çağırdım. Onlar Ramiq və Ənvər idi. Saat 12:00-da gördük ki, məlumat düzdür, qoşunlar şəhərə girib. Bizə məlumat verdilər ki, insanları vəhşicəsinə qətlə yetirirlər”.
Bu fikirləri News24.az-a açıqlamasında 20 Yanvar metro stansiyasının adını təklif edən İbrət Tahirov deyib.
O, həmin gecə metronun çox vacib iş gördüyünü bildirib: “Normalda metro saat 12:00-a kimi çalışırdı, interval belə idi. Amma həmin gün səhərə qədər fəaliyyət göstərdi. Adam çox olduğu üçün depodakı vaqonları da istifadəyə verdik. Həmin gecə metro çalışmasaydı, qətlə yetirilən insanların sayı qat-qat çox olardı”.
20 Yanvar metro stansiyasının adını qoyan İ.Tahirov iclasda bu təklifin qəbul olunduğunu deyib: “Həmin gecədən sonra “11-ci Qızıl Ordu stansiyası” adı ləğv edildi”.
Veteran maşinist təsirləndiyi bir hadisəni bizimlə bölüşüb: “Heç yadımdan çıxmaz. Səhər saat 5-də Nərimanov bağına tərəf çıxanda gördüm ki, tankın lüləsi metronun çıxışına dirənib. 33 ildir o stansiyaya girəndə həmin görüntü yadıma düşür, eyni hissləri keçirirəm, dəhşətdir”.
News24.az 20.01.2023
