20 IYUL / 2021 / 09:00
Qurban bayramı müsəlman dünyasının ən ülvi və müqəddəs bayramlarından biridir. Bu bayram İslam dininin təbliğ etdiyi ali keyfiyyətlər olan mərhəmət və halallığın, birlik və bərabərliyin, həmrəylik və qardaşlığın rəmzidir, insanları xeyirxah əməllərə, paklığa, saflığa səsləyir. Uca Allaha sədaqətin tərənnümü olan Qurban bayramı builki ovqatı xüsusidir. Bu bayrama Zəfər sevinci də qarışıb, edilən dualar, kəsilən qurbanlar öz məqamına yetişib.
44 günlük Vətən müharibəsi Azərbaycan xalqının böyük Zəfəri ilə tariximizin ən parlaq səhifələrindən birinə çevrilib. Uzun illərdən bəri düşmən tapdağı altında qalmış torpaqlarımızın işğaldan azad edilməsi Azərbaycan xalqının özünə inamını qaytarıb, xalqın öz liderinə və onun qüdrətinə etibarını daha da möhkəmləndirib.
Bu xoşbəxtliyi, bu qüruru bizə nəsib edən Ali Baş Komandan İlham Əliyevin rəhbərliyi ilə rəşadətli Azərbaycan Ordusu xalqın, onun liderinin və şanlı ordumuzun gücünü dünyaya nümayiş etdirib.
“Bakı Metropoliteni” QSC-nin kollektivi, bəşəri dəyərlərin tərənnümçüsü sayılan Qurban bayramı münasibəti ilə xalqımızı, soydaşlarımız və bütün İslam dünyasını səmimi qəlbdən təbrik edir, kəsilən qurbanların və duaların Allahın uca dərgahında qəbul olunmasını diləyir.
Qoy bu əziz bayramın nuru ocaqlarımıza sevinc və ruzi, süfrələrimizə bolluq və bərəkət gətirsin, gələcəyə ümid və inamımızı gücləndirsin, birlik və bərabərliyimizi daha da möhkəmləndirsin.
Bayramınız mübarək!
