08 IYUL / 2022 / 12:08
Xalqımızın milli sərvəti olan milli-mədəni irsimizin qorunması və inkişaf etdirilməsində, multikulturalizm ənənələrinin bərqərar olmasında, insanlarımızda mənəvi paklıq və gözəl əxlaqi keyfiyyətlərin aşılanmasında İslam dininin müstəsna rolu olmuş və hazırda da davam etməkdədir. Mərhəmət, xeyirxahlıq, humanizm kimi dəyərlər İslamın təməl sütunlarındandır.
Bəşəriyyətin uca Allaha sədaqətinin ifadəsi, mərhəmət, bəşər sevgisinin ali rəmzi kimi təcəlla edən Qurban bayramı, bütün müsəlman aləmində olduğu kimi, ölkəmizdə də böyük təntənə ilə qeyd olunur. Bu bayram cəmiyyətimizin mənəvi dayaqlarını daha da gücləndirir, milli həmrəyliyin, humanizm və qardaşlığın, xeyirxahlıq və mərhəmət duyğularının parlaq təcəssümünü özündə daşıyır.
“Bakı Metropoliteni” QSC-nin zəhmətkeş kollektivi adından ən ülvi hisslərin tərənnümçüsü olan Qurban bayramı münasibəti ilə xalqımızı, soydaşlarımızı, müsəlman dünyasını səmimi qəlbdən təbrik edir, kəsilən qurbanların və duaların Allah dərgahında qəbul olunmasını arzulayırıq.
Bayramınız mübarək!
