25 IYUN / 2023 / 15:49
Müqəddəs Qurban bayramı bütün dünya müsəlmanları tərəfindən qeyd edilən ,İslam dininin ən müqəddəs bayramlarından biri hesab olunur. Bəşəriyyəti sülhə, ədalətə, bərabərliyə səsləyən İslam dini öz bayramları ilə insanlar arasında mərhəməti, həmrəyliyi, xeyirxahlığı təcəssüm etdirir.
Qədim tarixə və mədəniyyətə malik olan xalqımız İslam dünyasının bir parçası kimi bu bayramı dini qaydalara uyğun olaraq hər il böyük Allah sevgisi ilə qeyd edir, qurbanlar kəsilir, xeyirxah əməllər təbliğ olunur.
Bu bayram günündə ehtiyacı olan şəxslərə, həssas əhali qruplarına, uşaq və qocalar evlərinə yardımlar edilir. Bu xeyriyyə işində Heydər Əliyev Fondunun və Fondun prezidenti, Azərbaycanın Birinci vitse-prezidenti Mehriban Əliyevanın xidmətləri əvəzsizdir.
Azərbaycan Respublikasının Prezidenti, müzəffər Ali Baş Komandan İlham Əliyevin qətiyyəti, siyasi iradəsi, xalqımızın birliyi və güclü ordumuzun əzmi ilə 44 gün ərzində işğal altındakı torpaqlarımız düşmən əsarətindən azad olundu. Qazanılan Zəfər xalqımızın qurbanlarının və dualarının qəbul olunduğunun göstəricisidir.
Qəhrəman Azərbaycan əsgərinin işğaldan azad olmuş ərazilərdə dövlətimizin üçrəngli bayrağını ucaltması, Şuşa və Ağdam məscidlərinin minarələrindən azan səsinin eşidilməsi İlahi ədalətin təcəssümüdür.
“Bakı Metropoliteni” QSC-nin zəhmətkeş kollektivi adından ən ülvi hisslərin tərənnümçüsü olan Qurban bayramı münasibəti ilə xalqımızı, soydaşlarımızı, bütün müsəlman dünyasını səmimi qəlbdən təbrik edir, kəsilən qurbanların və duaların Allah dərgahında qəbul olunmasını arzulayırıq.
Bayramınız mübarək!
