31 DEKABR / 2023 / 13:11
31 Dekabr - Dünya Azərbaycanlılarının Həmrəyliyi Günü və Yeni - 2024-cü ilin gəlişi münasibətilə hər birinizi ürəkdən təbrik edir, əmin-amanlıq, rifah, sağlamlıq, xoş gələcək arzulayırıq.
Yola saldığımız 2023-cü il bir çox qürurverici hadisələrlə yadda qalacaq. Ümummilli Lider Heydər Əliyevin 100 illiyinə həsr edilmiş bu ildə 44 günlük Vətən müharibəsində əldə etdiyimiz şanlı qələbənin davamı olaraq, Ali Baş Komandan İlham Əliyevin əmrinə əsasən rəşadətli ordumuzun keçirdiyi antiterror əməliyyatı nəticəsində ölkəmizin suverenliyi və ərazi bütövlüyü tam bərpa olundu.
2023-cü ildə Bakı metropoliteninin fəaliyyətində bir sıra yeniliklər oldu. Üç yeni nəsil qatar xəttə buraxıldı. Altı yeni ventilyator və bir o qədər də təbii havalandırma sistemi quraşdırıldı. “Xocəsən” stansiyasının 2022-ci il dekabrın 23-də cənab Prezidentin iştirakı ilə fəaliyyətə başlaması ilə ötən il paytaxtımızın daha bir istiqaməti üzrə bu nəqliyyat növünə müraciət edənlərin sayı artdı.
Elektrik depoları metropolitenlər üçün həyati vacib infrastrukturdur. Bu mənada müstəqillik tarixində inşa edilmiş və yerli mütəxəssilərin mühəndis düşüncə tərzinin məhsulu olan ilk elektrik deposu “Xocəsən” deposunun infrastruktur quruculuğu işləri aparıldı və Bənövşəyi xəttin bütün təchizat və təsərrüfat işləri buradan həyata keçirildi. “Nərimanov” elektrik deposunda da bir sıra iri layihələr həyata keçirildi və növbəti layihələrin təməli qoyuldu.
Stansiyaların fəaliyyəti, qatarların və sərnişinlərin hərəkət təhlükəsizliyi baxımından icra olunan layihələr də uğurların tərkib hissəsi kimi diqqət çəkir. Xüsusən postpandemiya dövründə ilk dəfə qatarların hərəkətinin ənənəvi qaydada payız-qış qrafikinin tətbiqi və sərnişinlərin sayının artmağa başlaması da ilin normal fəaliyyətə keçidinin tərkib hissəsi kimi xüsusi qeyd olunmalıdır.
Bir sözlə, metropolitençilər hər bir sərnişinə nümunəvi xidmət göstərmək əzmindədirlər. Təzə ilin Azərbaycanımızın həyatına, metromuzun fəaliyyətinə daha böyük yeniliklər gətirəcəyinə inanırıq.
Qoy 2024-cü il vətənimiz, xalqımız və hər bir vətəndaşımız üçün sağlıqlı, xeyirli-bərəkətli, düşərli olsun. Hamınıza bol ruzi, sevinc, xoşbəxtlik arzu edirik.
Bayramlarınız mübarək!
