25 IYUL / 2024 / 21:27
“Bakı Metropoliteni” QSC-də Metropoliten İşçiləri Həmkarlar İttifaqı (MİHİ) əmək fəaliyyətində fərqlənən ilin gəncləri ilə görüş keçirib. Azərbaycan Həmkarlar İttifaqları Konfederasiyasının (AHİK) hər il müəssisələrdaxili apardığı stimullaşdırıcı seçimlərə əsasən, Bakı metropoliteninin iki əməkdaşı - İnsan resursları və layihələrin idarə edilməsi departamentinin aparıcı mütəxəssisi Çiçək İsmayılova və Depolar üzrə iş dapartamentinin mühəndisi Orxan Xurşudzadə “İlin gənci” nominasıyasında qalib adına layiq görülüb.
Qaliblərə QSC və AHİK rəhbərliyinin təbriklərini çatdıran MİHİ sədri Bəhruz Əhmədov tapşırıqların öhdəsindən gələrək əməkdə xüsusi fərqlənmiş əməkdaşlara diplom və mükafatı təqdim edib.
Orxan Xurşudzadə Azərbaycanın 44 günlük Vətən müharibəsinin qəhrəmanlarındandır. Döyüşlərdə rəşadəti ilə seçilən qazi 2020-ci ildə Azərbaycan Respublikası Prezidentinin sərəncamları ilə “Cəbrayılın azad olunmasına görə” və “Hərbi xidmətlərə görə” medalları ilə təltif edilib.
O, “Bakı Metropoliteni” QSC və Metropoliten İşçiləri Həmkarlar İttifaqınin (MİHİ) birgə təsis etdiyi “Metropolitendə işləyən şəhid ailələrinə və Qarabağ müharibələrinin veteranlarına yardım mərkəzi” İdarə heyətinin üzvü seçilib. Qeyd olunmalıdır ki, 2022-ci ilin may ayında yaradılmış Mərkəz müəssisədə çalışan şəhid ailələrinin üzvləri və müharibə veteranlarının sosial qayğılarını müntəzəm diqqətdə saxlayaraq, daxil olmuş müraciətlərə operativ və xüsusi həssaslıqla baxılmasını təmin edir.
Bakı metropolitenində işə Əsaslı təmir xidmətinin Mühasibat uçotu şöbəsində xəzinədar kimi başlamış Çiçək İsmayılova müxtəlif illərdə mühəndis və mühasib vəzifələrində səmərəli fəaliyyəti ilə seçilib.
2019-cu ildən müəssisədə çalışaraq, ən mühüm sahələrdən biri olan vaqon təsərrüfatının texniki və istehsalat işində seçilən Orxan Xurşudzadə və metropolitendə 12 illik əmək təcrübəsi olan Çiçək İsmayılova mükafata görə AHİK və MİHİ rəhbərliyinə, karyera quruculuğu və əmək uğurları ilə seçilmək imkanı yaradılmış “Bakı Metropoliteni” QSC kollektivinə təşəkkürlərini bildiriblər.
