05 IYUL / 2021 / 15:14
Bakı metropoliteni ölkəmizin ilk dəfə ev sahibliyi etdiyi daha bir irimiqyaslı mötəbər kütləvi idman yarışı zamanı sərnişinlərinə nümunəvi xidmət göstərib. UEFA-nın futbol üzrə Avropa çempionatının final mərhələsində “A” qrupunun üç oyunu “Koroğlu” stansiyasının yaxınlığında yerləşən Bakı Olimpiya Stadionunda keçirilib.
“COVID-19” pandemiyası səbəbilə gücləndirilmiş iş rejimində çalışan Bakı metropoliteni oyunların keçirildiyi günlərdə xüsusi tədbirlər planı üzrə fəaliyyət göstərib. Həmin plana uyğun olaraq, “Koroğlu” stansiyasında operativ qərargah yaradılıb. Tədbirlərin əməliyyat-qrafik üzrə yerinə yetirilməsi, hərəkətin tənzimlənməsi və sərnişindaşıma prosesi üzrə digər vacib qərarlar buradan verilib. Stansiyada müvafiq dövlət strukturlarının fəaliyyəti üçün lazımi imkanlar yaradılıb. Digər stansiyalarda fəaliyyət göstərən operativ mərkəzlərə qərargahdan müvafiq təlimatlar, tapşırıqlar verilib, hər sahənin hazırlığı yoxlanılaraq, nəzarət təmin olunub.
Sərnişin axınının tənzimlənməsi məqsədilə nəzərdə tutulan ehtiyat qatarlar oyun ərəfəsi və matçlar başa çatdıqdan sonra xəttə buraxılıb. Bununla metropolitendə sıxlıq müşahidə olunmadan, sərnişinlərin təhlükəsiz və rahat daşınması təmin edilib.
Paytaxt metropoliteni qitə çempionatı ərəfəsində sərnişinlərinə bir neçə sosial əhəmiyyətli yenilik təqdim edib. Oyunların keçirildiyi 4 gün ərzində səhər saatlarından 7 stansiyada (“İçərişəhər”, “Sahil”, “28 May”, Gənclik”, “Nəriman Nərimanov”, “Koroğlu” və “Nizami”) üzərində “Ask me” (“Məndən soruş”) yazılmış köynəklərdə olan könüllülər fəaliyyət göstərib. Azərbaycan Könüllü Təşkilatları İttifaqı ilə əməkdaşlıq çərçivəsində iki növbədə çalışan 30 könüllü sərnişinləri məlumatlandırıb, onların həm metropolitendə, həm də stansiyaların yaxınlığında yerləşən mühüm obyektlərə yönlədirilməsində, eyni zamanda metropolitendən istifadə qaydaları ilə bağlı və digər sualların cavablandırılmasında xüsusi rol oynayıblar. Ehtiyacı olan sərnişinlər yaddaş kitabçası, şəhər və Avropa çempionatı haqqında məlumat broşürü və digər vəsaitlərlə təmin ediliblər.
Stansiya və qatarlarda monitorlarda, stansiyaların divarlarındakı statik lövhələrdə əks olunmuş mövzular sərnişinləri qitə futbol çempionatının Bakı günləri barədə məlumatlar diqqətə çatdırılıb. “Özünü qoru, oyundan həzz al” sosial posteri sərnişinləri pandemiya şəraitində təhlükəsizliyini və sağlamlığını unutmadan futbol oyunundan həzz almağa səsləyib. Həmçinin iki oyununu Bakıda keçirmiş Türkiyə millisinə dəstəyi ifadə edən posterlər quraşdırılıb. Ulu öndər Heydər Əliyevin “Bir millət, iki dövlət” ifadəsinin də yer aldığı “Türkiyə, ürəyimiz səninlə döyünür” posteri iki qardaş ölkənin birliyini tərənnüm edib. Bakıdakı oyunların təqviminin yer aldığı lövhələr isə hər günün tarixi hadisə olduğunu xatırladıb.
