19 MART / 2022 / 11:23
“Bakı Metropoliteni” QSC-nin bayram tədbirləri çərçivəsində daha bir layihəsi metro istifadəçilərinin, xüsusən azyaşlı sərnişinlərin marağına səbəb olub. Bunu nəzərə alaraq, “İçərişəhər” stansiyasında təşkil edilmiş Novruz bayramı şənliklərinin proqramına uşaqdan böyüyə hər kəsin tanıdığı və sevdiyi, “Parni iz Baku” Şən və Hazırcavablar Klubunun veteranı Bəhram Bağırzadə ilə görüşü də daxil edilib.
O, həm də uşaqlar üçün zəngin məlumatlar olan kitabların da müəllifi kimi məşhurdur. Bakı metropolitenində keçirilən hər belə görüş Bəhram Bağırzadənin imza gününə də çevrilir.
Tədbirlərin ən yaddaqalan məqamlarından birinə çevrilən görüş stansiya vestibülündə başlanıb. Şən zarafatları və suallara hazırcavablığı ilə yenə insanların diqqətini çəkən Bəhram Bağırzadə sonra platformaya enərək, stansiyanın birinci baş yolunda nümayiş etdirilən retro vaqonlarda görüşünü davam etdirib.
Bu dəfə “Bakı Metropoliteni” QSC Bəhram Bağırzadənin günün ovqatına uyğun nəşrlərinin - xalqımızın bayram adət-ənənələrini özündə əks etdirən, zəngin məlumatlı “Novruz” və məşhur milyonçu və xeyriyyəçi Hacı Zeynalabdin Tağıyevə həsr olunmuş kitablarının imza gününü retro vaqonlarda təşkil edib.
Bəhram Bağırzadənin azyaşlı sərnişinlərlə görüşü maraqlı söhbətlər və xatirə şəkillərinin çəkdirilməsi ilə yekunlaşıb.
