07 MART / 2022 / 16:05
Ülvilik, zəriflik və gözəllik rəmzi, müqəddəs varlıq olan qadının Azərbaycan cəmiyyətindəki rolu hər zaman yüksək tutulub. Azərbaycan qadını bütün dövrlərdə zəkası, iradəsi və əzmi ilə milli-mənəvi dəyərlərimizin qorunub saxlanılması və yaşadılmasında müstəsna xidmətlər göstərib. Tariximizin və mədəniyyətimizin neçə-neçə şanlı, parlaq səhifəsi məhz xanımlarımızın adı ilə xüsusi dəyər alıb. Azərbaycan qadını dünya sivilizasiyasına bəşəriyyətin mədəni fikir xəzinəsinin incilərini yaradan dahi şəxsiyyətlər, görkəmli elm və mədəniyyət xadimləri, şanlı tariximizdə misilsiz iz buraxmış qəhrəmanlar, neçə-neçə igid övladlar, tanınmış siyasi xadimlər bəxş edib. Xalqımızın təfəkküründə ANA məfhumu doğma yurdun, Vətən torpağının təcəssümüdür. Təsadüfi deyil ki, doğma dilimiz də ana dili adlanır.
Ötən əsrdə qadın hüquqlarının qazanılması və qorunması yolunda misilsiz uğurlar əldə etmiş Azərbaycan qadını bu gün ölkəmizin ictimai-siyasi, iqtisadi, mədəni həyatının fəal iştirakçısıdır. Azərbaycan qadını taleyüklü, milli məsələlərin həllinə dəyərli töhfələr verir. İdarəetmə, elm, təhsil, mədəniyyət, səhiyyə, idman və digər sahələrdəki nailiyyətləri Azərbaycan qadınının çox böyük potensiala malik olduğunu zaman-zaman təsdiq edib.
Azərbaycan Respublikasının Birinci vitse-prezidenti Mehriban xanım Əliyevanın rəhbərliyi ilə milli maraqlarımıza xidmət edən və ənənələrimizi yaşadan çoxsaylı sosial layihələrin uğurla icra olunması Azərbaycan qadınının mərhəmət və xeyirxahlığının, zəngin mənəvi-intellektual və yüksək əxlaqi dəyərlərə malik olduğunun bariz nümunəsidir.
Bəşəriyyət tarixində ən əlamətdar günlərdən biri olan 8 mart tarixi Beynəlxalq Qadınlar Günü bayram kimi müxtəlif dövlətlərdə, eləcə də respublikamızda təntənəli şəkildə qeyd olunur.
Qadın əməyi digər sahələrdə olduğu kimi, Bakı metropolitenində də həmişə aparıcı planda olub və onların fəaliyyəti yüksək qiymətləndirilib. Metropolitendə çalışanların 21,4 faizini qadınlar təşkil edir.
“Bakı Metropoliteni” QSC Azərbaycan qadınlarını 8 Mart - Beynəlxalq Qadınlar Günü münasibətilə təbrik edir, onlara cansağlığı, ailə səadəti, çalışdıqları hər bir sahədə uğur və müvəffəqiyyətlər arzulayır.
