01 APREL / 2022 / 11:10
Bayram günlərində metropolitençilərin mədəni istirahətinin və asudə vaxtlarının artıq ənənəyə çevrilmiş səmərəli təşkili builki Novruz günlərində də davam etdirilib.
“Bakı Metropoliteni” QSC və Metropoliten İşçiləri Həmkarlar İttifaqının rəhbərliyinin təşəbbüsü və təşkilatçılığı ilə əməkdə fərqlənən bir qrup metropolitençinin bayram istirahəti ailə üzvləri ilə birlikdə ölkəmizin dilbər guşələrindən sayılan Şəki şəhərində təşkil edilib.
Müxtəlif xidmət işçilərini əhatə edən bu bayram səfərindən, ümumilikdə, 85 nəfər istifadə edib. Onlar martın 19-dan 22-dək və 22-dən 25-dək Şəkinin "Şəki Palace " otelində dincəliblər. İstirahətin mənalı və səmərəli keçirilməsini təmin etmək məqsədilə bütün səfər xərclərini müəssisə və həmkarlar təşkilatı ödəyib, istirahətin maraqlı keçməsi üçün hərtərəfli şərait yaradılıb.
Metropolitençilər istirahət mərkəzində dincəlməklə yanaşı, Şəkinin və ətraf bölgələrin tarixi, milli-mədəni əhəmiyyətli, gəzməli-görməli məkanlarına ekskursiyaya getmək imkanı əldə ediblər. Şəki Xan sarayı, Kiş kəndi, qədim Alban kilsəsi və.s. tarixi abidələr səfər iştirakçılarının böyük marağına səbəb olub.
Bundan savayı, metropolitençilərin azyaşlı övladlarının paytaxtın mədəniyyət mərkəzlərində təşkil olunan bayram şənliklərində iştirakı məqsədilə biletlər təqdim olunub.
